ఓ క్రైమ్‌ను పోలీసులు పరిష్కరించాలంటే క్లూస్ టీం ప్రాముఖ్యత ఎంత ఉంటుందని బయట ఉండే సాధారణ జనాలకు తెలియదు. ఓ క్రిమినల్‌ను పట్టుకునేందుకు క్లూస్, ఫోరెన్సిక్ డిపార్ట్మెంట్లు పడే కష్టాన్ని చూపించే చిత్రమే అథర్వ. సస్పెన్స్, క్రైమ్ జానర్లో అన్ని రకాల ఎమోషన్స్‌తో తెరకెక్కించిన చిత్రం ‘అథర్వ’. నూతలపాటి నరసింహం, అనసూయమ్మ సమర్పణలో పెగ్గో ఎంటర్‌టైన్‌మెంట్స్ బ్యానర్‌పై ఈ చిత్రం రూపొందింది. ఈ సినిమాలో కార్తీక్ రాజు, సిమ్రాన్ చౌదరి, ఐరా హీరోహీరోయిన్లుగా నటించారు. ఈ మూవీకి మహేష్ రెడ్డి దర్శకత్వం వహించగా సుభాష్ నూతలపాటి నిర్మించారు. విజయ, ఝాన్సీ ఎగ్జిగూటివ్ ప్రొడ్యూసర్స్‌గా వ్యవహరించారు. డిసెంబర్ 1న ప్రేక్షకుల ముందుకు రాబోతున్న ఈ మూవీని తాజాగా పోలీస్ డిపార్ట్మెంట్లోని క్లూస్, ఫోరెన్సిక్ విభాగం వారు వీక్షించారు. అనంతరం
తెలంగాణ స్టేట్ ఫొరెన్సిక్ సైన్స్ లేబరేటరి అడిషనల్ డైరెక్టర్ డా.అనిత ఎవాంజెలిన్ మాట్లాడుతూ.. ‘పోలీస్ డిపార్ట్మెంట్లో ఈ క్లూస్ టీం ఎంత ప్రముఖమైందో చూపించారు. నాకు చాలా సంతోషంగా ఉంది. ఈ సినిమా నాకు చాలా నచ్చింది.. మా వాళ్లని హీరోల్లా చూపించారు. ఫోరెన్సిక్, క్లూస్ డిపార్ట్మెంట్లు వేరు. ఈ సినిమా మా అందరికీ ఓ నివాళిలా అనిపించింది. మా కష్టాన్ని అందరికీ తెలిసేలా తీసిన ఈ సినిమా పెద్ద విజయాన్ని సాధించాలి’ అని అన్నారు.
హైద్రాబాద్ సిటీ పోలీస్, క్లూస్ జాయింట్ డైరెక్టర్ డా.వెంకన్న మాట్లాడుతూ.. ‘మహేష్ గారు ఈ కథను నాకు ముందు నెరేట్ చేశాడు. క్లూస్ డిపార్ట్మెంట్‌ను ఎలా చూపిస్తారా? అని అనుకున్నాను. సినిమాను అద్భుతంగా తెరకెక్కించారు. చివరి వరకు ఉత్కంఠభరితంగా తీశారు. మేం రెగ్యులర్‌గా క్రైమ్ సీన్లను చూస్తుంటాం. అందుకే ఆ జానర్లో తీసే చిత్రాలను చూడం. కానీ ఈ అథర్వ మాత్రం అద్భుతంగా అనిపించింది. క్రైమ్ సీన్ ఆఫీసర్ అంటే అథర్వలో కార్తీక్ రాజులా ఉండాలనేలా చూపించారు. ఈ సినిమా తప్పకుండా విజయం సాధిస్తుంద’ని అన్నారు.
అథర్వ సినిమాను దాదాపు వందకు పైగా క్రైమ్ సీన్ ఆఫీసర్లు చూశారు. అందరికీ ఈ సినిమా తెగ నచ్చేసింది. ప్రేక్షకులను సైతం మెప్పిస్తుందని వారంతా అన్నారు. డిసెంబర్ 1న అథర్వ చిత్రం ప్రేక్షకుల ముందుకు రాబోతోంది.