ఘనంగా ‘హరి హర వీరమల్లు’ చిత్ర ‘తార తార’ గీతావిష్కరణ కార్యక్రమం

‘హరి హర వీరమల్లు’ చిత్రం ఘన విజయం సాధిస్తుంది: చెన్నై వేడుకలో చిత్ర బృందం

పవర్ స్టార్ పవన్ కళ్యాణ్ చారిత్రాత్మక యోధుడిగా కనువిందు చేయనున్న ప్రతిష్టాత్మక చిత్రం ‘హరి హర వీరమల్లు’. ప్రముఖ నిర్మాత ఎ.ఎం. రత్నం సమర్పణలో మెగా సూర్య ప్రొడక్షన్స్ పతాకంపై ఎ. దయాకర్ రావు నిర్మిస్తున్న ఈ చిత్రానికి క్రిష్ జాగర్లమూడి, జ్యోతి కృష్ణ దర్శకత్వం వహిస్తున్నారు. ఆస్కార్ విజేత ఎం.ఎం. కీరవాణి సంగీతం అందిస్తున్నారు. నిధి అగర్వాల్ కథానాయికగా నటిస్తున్న ‘హరి హర వీరమల్లు’లో బాబీ డియోల్ ముఖ్య పాత్ర పోషిస్తున్నారు. జూన్ 12న ప్రపంచవ్యాప్తంగా భారీస్థాయిలో విడుదల కానున్న ఈ సినిమాపై అంచనాలు తారాస్థాయిలో ఉన్నాయి. ఇప్పటికే విడుదలైన ప్రచార చిత్రాలు, మూడు గీతాలు విశేషంగా ఆకట్టుకున్నాయి. తాజాగా ఈ చిత్రం నుంచి మరో గీతం ‘తార తార’ విడుదలైంది. ఈ పాట ఆవిష్కరణ కార్యక్రమాన్ని చిత్ర బృందం చెన్నైలో ఘనంగా నిర్వహించింది.

‘తార తార’ గీతం మనసుని హత్తుకునేలా శ్రావ్యంగా ఉంది. పవన్ కళ్యాణ్, నిధి అగర్వాల్ పై చిత్రీకరించిన ఈ గీతం వెండితెరపై ప్రేక్షకులకు సరికొత్త అనుభూతిని పంచనుంది. ఇద్దరి జోడి చూడటానికి ఎంతో అందంగా ఉంది. లిరికల్ వీడియోలో భారీతనం కనిపిస్తోంది. ఎం.ఎం. కీరవాణి సంగీతం హృద్యంగా ఉంది. శ్రీ హర్ష తన సాహిత్యంతో పాటకు మరింత అందం తీసుకొచ్చారు. లిప్సిక భాష్యం, ఆదిత్య అయ్యంగార్ ఈ గీతాన్ని ఆలపించిన తీరు కట్టిపడేసింది. ప్రస్తుతం ‘తార తార’ గీతం సామజిక మాధ్యమాల్లో వైరల్ గా మారింది.

‘తార తార’ గీతావిష్కరణ కార్యక్రమంలో ప్రముఖ నిర్మాత ఎ.ఎం. రత్నం మాట్లాడుతూ, “చెన్నైతో నాకు మంచి అనుబంధం ఉంది. పలు గొప్ప తెలుగు సినిమాలను తమిళ ప్రేక్షకుల ముందుకు తీసుకొచ్చాను. అలాగే పలు తమిళ సినిమాలను తెలుగులో ప్రేక్షకులకు అందించాను. ముఖ్యంగా ‘ఇండియన్’ చిత్రం నిర్మాతగా నాకు ఎంతో పేరు తీసుకొచ్చింది. సినిమా ద్వారా వినోదంతో పాటు, ఏదో ఒక సందేశం ఇవ్వాలనేది నా తపన. 90 శాతానికి పైగా నా సినిమాలు విజయం సాధించాయి. నా కుమారుడు జ్యోతికృష్ణ గురించి ప్రత్యేకంగా చెప్పాలి. చిన్న వయసులోనే గొప్ప కథలతో ప్రముఖ దర్శకులను మెప్పించాడు. ఇప్పుడు పాన్ ఇండియా చిత్రం హరి హర వీరమల్లు బాధ్యతను క్రిష్ గారి దగ్గర నుంచి తీసుకొని, సినిమా అద్భుతంగా రావడంలో కీలక పాత్ర పోషించాడు. ఐదు సంవత్సరాలు ఎంతో కష్టపడి ఈ సినిమాని రూపొందించాము. కీరవాణి గారు అద్భుతమైన సంగీతం అందించారు. ఈ సినిమా కోసం ఐదేళ్లు వెచ్చించిన నిధి అగర్వాల్ కి ప్రత్యేక కృతఙ్ఞతలు.” అన్నారు.

చిత్ర సంగీత దర్శకుడు ఎం.ఎం. కీరవాణి మాట్లాడుతూ, “ఎ.ఎం. రత్నం గారి ముఖంలో నేను కోపం ఎప్పుడూ చూడలేదు. శాంతంగా, చిరునవ్వుతో ఉంటారు. ఆయన రియల్ హీరో. హరి హర వీరమల్లు సినిమా ఘన విజయం సాధిస్తుందని నేను నమ్ముతున్నాను. పవర్ స్టార్ పవన్ కళ్యాణ్ గారి సినిమా అంటే సంగీతంలో పవర్ కనిపించాలి. సంగీత విషయంలో జ్యోతికృష్ణ నాకెంతో స్వేచ్ఛను ఇచ్చాడు. ఈ సినిమా కోసం ఎంతో కష్టపడ్డాడు. ఈ చిత్రం ఘన విజయం సాధించి.. ఎ.ఎం. రత్నం గారికి, జ్యోతికృష్ణకి సినిమాకి పని చేసిన ప్రతి ఒక్కరికీ మంచి పేరు తీసుకురావాలని కోరుకుంటున్నాను.” అన్నారు.

చిత్ర దర్శకుడు జ్యోతి కృష్ణ మాట్లాడుతూ, “అజిత్ గారి సూచన మేరకు నాన్నగారి లెగసీని కంటిన్యూ చేయాలనే ఉద్దేశంతో.. డైరెక్షన్ ను పక్కనపెట్టి, కొన్నేళ్లు ప్రొడక్షన్ వైపు ఉన్నాను. అదే మాట పవన్ కళ్యాణ్ గారు. ఎ.ఎం. రత్నం గారి పేరు నిలబెట్టాలని చెప్పారు. పవన్ కళ్యాణ్ కేవలం నటుడు మాత్రమే కాదు.. తెలివైన వారు, ఎన్నో విభాగాల్లో పట్టుంది. రాజకీయాల్లో కూడా రాణిస్తున్నారు. ‘హరి హర వీరమల్లు’ విషయంలో పవన్ కళ్యాణ్ గారు మాకు ఎంతో సపోర్ట్ చేశారు. ‘అసుర హననం’ పాటలో ఫైట్ కి కూడా ఆయన కొరియోగ్రఫీ చేశారు. మొఘల్ సామ్రాజ్యం నేపథ్యంలో ఈ చిత్ర కథ ఉంటుంది. పవన్ కళ్యాణ్ గారు పోషించిన వీరమల్లు పాత్ర మన సంస్కృతి, సంప్రదాయాలకు అడ్డం పట్టేలా ఉంటుంది. సనాతన ధర్మం గొప్పతనాన్ని చాటిచెప్పేలా ఉంటుంది. ఆరోగ్యం బాలేనప్పుడు కూడా పవన్ కళ్యాణ్ గారు ఈ సినిమా కోసం పనిచేశారు. సాంకేతికంగా ఈ సినిమా ఉన్నతంగా ఉంటుంది. అంతర్జాతీయ స్థాయి గ్రాఫిక్స్ కంపెనీ ఈ చిత్రం కోసం పని చేశాయి. భారీస్థాయిలో ఎక్కడా రాజీ పడకుండా సినిమాని రూపొందించాము. పవన్ కళ్యాణ్ గారు, నిధి అగర్వాల్ మధ్య కెమిస్ట్రీ చక్కగా కుదిరింది. నాజర్ గారు, సత్య రాజ్ గారు వంటి సీనియర్ నటులతో కలిసి పని చేయడం సంతోషంగా ఉంది. కీరవాణి గారు, తోట తరణి గారు, నాన్న రత్నం గారు లాంటి లెజెండ్స్ తో పని చేయడం గౌరవంగా భావిస్తున్నాను. ‘హరి హర వీరమల్లు’కి పార్ట్ 2 కూడా ఉంది. ఈ చిత్రం అందరి అంచనాలను మించేలా ఉంటుందని, మన దేశంలో గొప్ప చిత్రాలలో ఒకటిగా నిలుస్తుందని నమ్ముతున్నాను.” అన్నారు.

చిత్ర కథానాయిక నిధి అగర్వాల్ మాట్లాడుతూ, “ముందుగా నాకు ఈ అవకాశం ఇచ్చిన ఎ. ఎం. రత్నం గారికి కృతఙ్ఞతలు. సినిమా కోసం అంతలా తపనపడే నిర్మాతను నేను చూడలేదు. సెట్ కి అందరికంటే ముందుగా వచ్చి, అందరికంటే ఆలస్యంగా వెళ్తారు. ఐదేళ్లు ఈ సినిమాని రత్నం గారు తన భుజాలపై మోశారు. రత్నం గారి కోసం ఈ సినిమా ఘన విజయం సాధించాలని మనస్ఫూర్తిగా కోరుకుంటున్నాను. జ్యోతి కృష్ణ గారు లాంటి దర్శకుడితో పని చేయడం సంతోషంగా ఉంది. నటీనటుల నుంచి సులువుగా మంచి నటనను రాబట్టుకుంటారు. కీరవాణి గారు సంగీతం అందించిన సినిమాలో భాగం కావడం గౌరవంగా భావిస్తున్నాను. పవన్ కళ్యాణ్ గారి చిత్రంలో భాగం కావడం అదృష్టంగా భావిస్తున్నాను. చిత్ర బృందమంతా ఎంతో కష్టపడి హరి హర వీరమల్లును రూపొందించింది. ఈ సినిమా మీ అందరికీ నచ్చుతుందని నమ్ముతున్నాను.” అన్నారు.

ప్రముఖ దర్శకుడు కె. ఎస్. రవికుమార్ మాట్లాడుతూ, “ఎ.ఎం. రత్నం గారితో నేను మూడు సినిమాలు చేశాను. ఆ సమయంలో జ్యోతి కృష్ణ చెప్పిన కథ విని ఆశ్చర్యపోయాను. మంచి ప్రతిభ, జ్ఞానం ఉన్నాయి. ‘హరి హర వీరమల్లు’ ప్రచార చిత్రాలు బాగున్నాయి. ఐదు సంవత్సరాలు కష్టపడి ఈ సినిమాని అద్భుతంగా రూపొందించారు. ‘హరి హర వీరమల్లు’ ఘన విజయం సాధించాలని, జ్యోతి కృష్ణతో పాటు చిత్ర బృందం అందరికీ మంచి పేరు తీసుకురావాలని కోరుకుంటున్నాను.” అన్నారు.

ప్రముఖ నటుడు నాజర్ మాట్లాడుతూ, “ఎన్ని అడ్డంకులు ఎదురైనా ఎ.ఎం. రత్నం గారు ఎంతో పట్టుదలతో ఇంతటి భారీ చిత్రాన్ని నిర్మించారు. జ్యోతి కృష్ణ చాలా ప్రతిభావంతుడు. రేయింబవళ్లు ఈ సినిమా కోసం ఎంతో కష్టపడ్డాడు. ఎ.ఎం. రత్నం గారు, జ్యోతి కృష్ణతో పాటు అందరి సమిష్టి కృషితో ఈ సినిమా ఇంత గొప్పగా వచ్చింది. పవన్ కళ్యాణ్ గారితో కలిసి నటించడం సంతోషంగా ఉంది. ప్రజాసేవలో, బాధ్యతాయుతమైన పదవిలో ఉన్న పవన్ కళ్యాణ్.. సినిమాలో సంభాషణల విషయంలో కూడా ఎంతో శ్రద్ధ తీసుకున్నారు. ఈ చిత్రం ద్వారా ప్రేక్షకులకు మంచి మాటలే చెప్పాలి అనేవారు.” అన్నారు.

ప్రముఖ నటుడు సత్యరాజ్ మాట్లాడుతూ, “తమిళ వారికి ఎంజీఆర్ ఎలాగో.. తెలుగు వారికి ఎన్టీఆర్ గారు అలా. అలాంటి గొప్ప వ్యక్తి జయంతి రోజు ఈ కార్యక్రమం జరగడం సంతోషంగా ఉంది. తండ్రిని మించిన తనయుడు అంటారు కదా.. ఎ.ఎం. రత్నం గారి తనయుడు జ్యోతి కృష్ణ అలాంటి వాడే. అతని ప్రతిభ చూసి ఆశ్చర్యపోయాను. ఈ చిత్రం ఘన విజయం సాధించాలని, జ్యోతి కృష్ణ గొప్ప స్థాయికి వెళ్లాలని కోరుకుంటున్నాను. ఈ చిత్రంలో హీరోయిన్ నిధి అగర్వాల్ కాదు నేను(నవ్వుతూ). హీరోయిన్ ని హీరో కాపాడుతాడు కదా. ఈ సినిమాలో పవన్ కళ్యాణ్ గారు నన్ను కాపాడతారు. అందుకే నా పాత్ర హీరోయిన్ పాత్ర లాంటిది అన్నాను. ఇంత గొప్ప చిత్రంలో భాగం కావడం చాలా ఆనందంగా ఉంది.” అన్నారు.

తారాగణం: పవన్ కళ్యాణ్, నిధి అగర్వాల్, బాబీ డియోల్, అనుపమ్ ఖేర్, సత్యరాజ్, జిషు సేన్‌గుప్తా, నాజర్, సునీల్, రఘుబాబు, సుబ్బరాజు, నరా ఫతేహి
దర్శకత్వం: క్రిష్ జాగర్లమూడి, జ్యోతి కృష్ణ
నిర్మాత: ఎ. దయాకర్ రావు
సమర్పణ: ఎ. ఎం. రత్నం
బ్యానర్: మెగా సూర్య ప్రొడక్షన్స్
సంగీతం: ఎం. ఎం. కీరవాణి
ఛాయాగ్రహణం: మనోజ్ పరమహంస, జ్ఞానశేఖర్ వి.ఎస్
కూర్పు: ప్రవీణ్ కె.ఎల్
సాహిత్యం: సిరివెన్నెల సీతారామశాస్త్రి, చంద్రబోస్, పెంచల్ దాస్
విజువల్ ఎఫెక్ట్స్: హరి హర సుతాన్, సోజో స్టూడియోస్, యూనిఫై మీడియా, మెటావిక్స్
కళా దర్శకుడు: తోట తరణి
నృత్య దర్శకత్వం: బృందా, గణేష్
స్టంట్స్: శామ్ కౌశల్, టోడర్ లాజారో జుజీ, రామ్ – లక్ష్మణ్, దిలీప్ సుబ్బరాయన్, విజయ్ మాస్టర్
పీఆర్ఓ: లక్ష్మీవేణుగోపాల్